சதுரங்க நாயகி

கருப்புக் குதிரையில்

நான் நான்கு கட்டங்கள் தாவுகிறேன்

வெள்ளை யானையில் நீ

வேகமாய் எதிர்பக்கம் கடந்துவிடுகிறாய்

உன் வேகத்தை நிகர்செய்ய முற்பட்டு

கோட்டையை நகர்த்துகிறேன் உன் பக்கமாய்

மறைந்திருந்த உன் வெள்ளை குதிரைகளுள் ஒன்று
கோட்டையை ஆட்டத்திலிருந்து வெளியேற்றுகிறது
தற்காப்பு ஆட்டமுறையாக
வெறும் சிப்பாய்களை மட்டும்
ஒவ்வொரு கட்டமாய் நகர்த்திவைக்கிறேன்
எதிர்பார்க்காத ஒரு கணத்தில்
இன்னும் நான்கு நகர்த்துதலில் ஆட்டம் முடியும் , என்கிறாய் நீ .
காய்களை இழக்காமல் தோற்கடிப்பதெப்படி என்ற
உன் சதுரங்க தந்திரங்களை அறியாமலே
தோற்றும் போகிறேன் நான் .