கற்பனையில் ஒரு மிருகம் !

உறக்கத்தில்
ஆளை விழுங்கிவிடும்
அபூர்வ மிருகமொன்று நகருக்குள்
அலைகிறதாம் .
பதிலாவது குறுக்குத்தெருவில்
ரெண்டுபேரும் ,
அடுத்தத் தெருவில் ஒரு
கூலித்தொழிலாளியும் ,
நேற்று இரவில் கடிபட்டார்கள்
என்கிறார்கள் .
மாயை போன்று வருவதும்
போவதும் தெரியாமல்
தூங்கினால் மட்டுமே வருமந்த
மிருகம் கடித்து
உயிர்பிழைத்தவர்கள் பிற்காலத்தில்
பெரிய ஆட்களாகவும் ஆக
வாய்ப்புகள் நிறைய உண்டாம் .
நான்
தூங்குவதுபோல நடிக்கப்போகிறேன்,
கடிபட்டவுடன் மிருகத்தை
ஏமாற்றிவிட்டு சட்டென்று எழுந்து ஓட
வசதியாக இருக்கும் !