எல்லோருக்குமான ....

எல்லோருக்கும் பொதுவான நதி
ஓடிக்கொண்டே இருக்கிறது
எல்லோருக்கும் பொதுவென்று
எண்ணமுடியாதபடி
குளித்துக்கொண்டிருக்கிறாள் ஒருத்தி
படித்துறையில் கொஞ்சநேரம்
அலைந்துகொண்டிருந்துவிட்டு
அசைந்து அசைந்து
ஆழம் செல்கிறாள்
கூழாங்கற்களோடு குறுகுறுக்கிறாள்
பாறைகளோடு வன்புணர்வு கொள்கிறாள்
திரும்பவும் கரை திரும்புகிறாள்
எல்லோருக்கும் பொதுவென்று
சொல்லிவிடமுடியாது அவளை...
சிலர் மூக்கைப் பிடித்துக்கொண்டு
முங்கி எழுகிறார்கள்
சிலர்
செம்புக்குடம் நிரப்பிச் செல்கிறார்கள்
சிலர் மட்டுமே
அள்ளியெடுத்து பருகிச் செல்கிறார்கள்
எல்லோருக்கும் பொதுவான நதியொருத்தி
ஓடிக்கொண்டே இருக்கிறாள் !