முகமூடியுடன் தொலைந்துபோ !

அழுதுவிடுவோம் என
பயப்படும் பொழுதுகளில்
யாரிடமும் பேசாமலிருப்பது நல்லது
முக்கியமாக நெருங்கிய நட்புகளிடம்
இதுநாள்வரையில் போர்த்தியிருந்த
கம்பீர முகமூடி கிழியக்கூடும்
நமக்கென்றிருந்த மாயபிம்பம் ஒன்று
சுக்குநூறாகும்
தனிமை அழுந்த
மதுவருந்தும் எண்ணம் மேலோங்கும்
பிறகு என்னதான் செய்யலாம்
நெரிசலான கடைவீதியில் புகுந்து
தொலையலாம்
பாலுக்காக அழும் குழந்தையிடம் சென்று
விளையாட்டுக் காட்டலாம்
அப்படி எதுவும் கிட்டாத தருணங்களில்
இப்படி வேண்டா வெறுப்பாக
எதையாவது
கிறுக்கியும் தொலைக்கலாம் !