வினாடிகளுக்கும்
வினாடிக்களுக்குமேயான இடைவெளியில்
ஒவ்வொருமுறையும் அவசரமாக
ஏறிப் பறக்கின்றன குட்டிப்
போர் விமானங்கள் .
பெரிது பெரிதாக
சத்தம்கேட்கும்போதெல்லாம் சிறிதாக
ஒன்று மேலெழும்பிப் பறப்பதை
அலுவலகக் கண்ணாடிச் சன்னல் காண்பிக்கிறது .
வேலையற்ற அல்லது
செய்ய விருப்பமற்ற
சோர்வான அலுவலக மதிய வேளைகளில் சுறுசுறுப்பாய்
கிளம்பும் விமானங்களைப்
பார்க்க பார்க்க ஆச்சர்யமாக உள்ளது .
"நானும் பைலட் ஆகிப் பறப்பேன் "
அக்காவிடம் சொல்லிக்கொண்டிருந்த குழந்தைப்
பிராயத்திலிருந்து விமானங்கள் மிகப் பிடிக்குமென்றாலும்,
எங்காவது போர் மூளலாம் என
நினைத்த கணத்திலிருந்து
இந்த ' போர் விமானங்கள்' கொஞ்சம்
பயமுறுத்தத்தான் செய்கின்றன .